Ali Jawwad Zaidi
ik ah-e-zer-e-lab ke gunahgar ho ga.e
ab ham bhi daḳhil-e-saf-e-aghyar ho ga.e
jis dard ko samajhte the ham un ka faiz-e-ḳhas
us dard ke bhi laakh ḳharidar ho ga.e
jin hauslon se mera junun mutma.in na tha
vo hausle zamane ke meyar ho ga.e
saaqi ke ik ishare ne kya sehr kar diya
ham bhi shikar-e-andak-o-bisyar ho ga.e
ab un labon men shahad o shakar ghul ga.e to kya
jab ham halak-e-talḳhi-e-guftar ho ga.e
har vaada jaise harf-e-ghalat tha sarab tha
ham to nisar-e-jur.at-e-inkar ho ga.e
teri nazar payam-e-yaqin de ga.i magar
kuchh taaza vasvase bhi to bedar ho ga.e
is mai-kade men uchhli hai dastar bar-ha
vaa.iz yahan kahan se numudar ho ga.e
sarsabz pattiyon ka lahu chuus chuus kar
kitne hi phuul raunaq-e-gulzar ho ga.e
‘zaidi’ ne taaza sher suna.e ba-rang-e-ḳhas
ham bhi fida-e-shoḳhi-e-inkar ho ga.e
Leave a Reply