koi markaz se alag hai koi mehvar se alag
aadmi ḳhud ho gaya hai apne paikar se alag
kitne ḳhanon men baTa hai ahd-e-nau ka aadmi
koi bahar se juda hai koi andar se alag
be-libasi ke siva ab kuchh nazar aata nahin
is qadar hai jism ḳhuddari ki chadar se alag
dagh-e-dil kashmir ka gujrat ka dil dardnak
hadisa koi kahan hai chhe december se alag
band thiin almariyon men chahaton ki filen
kis ne ki ‘aḳhtar’ ye dastavez daftar se alag
Leave a Reply