Urooj Zaidi Badayuni
talḳhi-e-gham mire ehsas ka sarmaya hai
husn se main ne ye in.am-e-vafa paaya hai
jab kabhi ishrat-e-rafta ka ḳhayal aaya hai
main nai pahron dil-e-be-tab ko samjhaya hai
haa.e ye be-ḳhudi ishq ko ma.alum nahin
kaun aaya hai kab aaya hai kahan aaya hai
dil ko simab sifat kah ke guzarne vaale
ḳhud pe taḌpa hai ki tu ne use taḌpaya hai
kafir-e-ishq na samjhun to use kya samjhun
mere iḳhlas ko ik dost ne Thukraya hai
apni is haar ko main jiit na kyuun kar samjhun
ḳhud ko khoya hai to ai dost tujhe paaya hai
tum mire hal-e-pareshan pe na tanqid karo
tum ne daman kabhi kanTon men bhi uljhaya hai
manzil-e-dil bhi vahi ku-e-malamat bhi vahi
ishq ka jazba-e-be-tab kahan laaya hai
aankh jhapkegi to shiraza bikhar ja.ega
kis ki avaz thi jis ne mujhe chaunkaya hai
jis ko kahte hain ghazal us ki badaulat hi ‘uruj’
ruḳh-e-urdu pe ye rang aur nikhar aaya hai
Leave a Reply