Recyclebin

Safiya Shamim

lafz vapas nahin hua karte

talkhiyon men ghule hue lahje

zarf ke haath kya hi mahir hon

phuul ban kar nahin khila karte

hazf karne ka aasra le kar

koi tahrir likh nahin dena

bhuul jaane ki iltija le kar

mat kaho koi harf-e-na-bina

kal jo khali gaya tha vaar koi

kargar aaj ho bhi sakta hai

bhuli-bisri gavahiyon ka shajar

bar-var aaj ho bhi sakta hai

nazar-andaz hone vaala dard

mo’atabar aaj ho bhi sakta hai

vaqt ki dhuul men ulajh kar bhi

zinda rahta hai saans leta hai

naqsh avaz ka ho harf ka ho

laakh ghaeb karo nigahon se

dil ke andar kahin pe rahta hai

naqsh ban kar nahin mita karte