Khalid Jamal
kisi ke ḳhvab ko ehsas se bandha hua hai
bahut puḳhta bahut hi paas se bandha hua hai
hamare taḳht ko mashrut kar rakkha hai us ne
hamare taaj ko ban-bas se bandha hua hai
siyahi umr bhar mere ta.aqub men rahegi
ki main ne jism ko qirtas se bandha hua hai
mire isbat ki chabi ko apne paas rakh kar
mire inkar ko ehsas se bandha hua hai
hamare ba.ad in abadiyon ki ḳhair kiijo
samundar ham ne apni pyaas se bandha hua hai
saja rakkhi hai us ne apni ḳhatir ek masnad
mire afaq ko anfas se bandha hua hai
ajab pahre mire afkar par rakkhe hain ‘ḳhalid’
ajab khaTka mire ehsas se bandha hua hai
Leave a Reply