Teri Yaadon Ko Bula Kar Tere Gesu Ki Tarah

terī yādoñ ko bulā kar tire gesū kī tarah

pahne rahte haiñ darīche mirī ḳhushbū kī tarah

haa.e jab hijr kī shab meñ tire bosoñ kī miThās

phail jaatī hai mire hoñToñ pe jaadū kī tarah

tū mire baaġh se toḌe hue ġhunche kī misāl

maiñ tire dasht meñ bhaTke hue aahū kī tarah

āsmāñ bāñTtā rahtā hai nasībe ‘aḳhtar’

din ko motī kī tarah raat ko aañsū kī tarah

Leave a Comment