Irfan Sattar
mire ḳhvabon se ojhal us ka chehra ho gaya hai
main aisa chahta kab tha par aisa ho gaya hai
ta.alluq ab yahan kam hai mulaqaten ziyada
hujum-e-shahr men har shaḳhs tanha ho gaya hai
tiri takmil ki ḳhvahish to puuri ho na paa.i
magar ik shaḳhs mujh men bhi adhura ho gaya hai
jo bagh-e-arzu tha ab vahi hai dasht-e-vahshat
ye dil kya hone vaala tha magar kya ho gaya hai
main samjha tha siyegi agahi chak-e-junun ko
magar ye zaḳhm to pahle se gahra ho gaya hai
main tujh se saath bhi to umr-bhar ka chahta tha
so ab tujh se gila bhi umr-bhar ka ho gaya hai
tire aane se aaya kaun sa aisa taghayyur
faqat tark-e-marasim ka mudava ho gaya hai
mira aalam agar puchhen to un se arz karna
ki jaisa aap farmate the vaisa ho gaya hai
main kya tha aur kya huun aur kya hona hai mujh ko
mira hona to jaise ik tamasha ho gaya hai
yaqinan ham ne aapas men koi va.ada kiya tha
magar us guftugu ko ek arsa ho gaya hai
agarche dastaras men agahi hai saari duniya
magar dil ki taraf bhi ek dar va ho gaya hai
ye bechaini hamesha se miri fitrat hai lekin
ba-qadr-e-umr is men kuchh izafa ho gaya hai
mujhe har sub.h yaad aati hai bachpan ki vo avaz
chalo ‘irfan’ uTh jaao savera ho gaya hai
Leave a Reply