Wafa Naqvi
ankhen mila rahe hain vahi asman se
vaqif nahin hain log jo apne jahan se
kya jaane kaisi jang hai tishna-labi ke saath
ḳhanjar hi haath dhone lage apni jaan se
ik dusre ke ḳhuun ki pyasi hai ka.enat
rahta nahin hai koi kahin bhi amaan se
taj-e-shahi pe ḳhaak uḌata raha faqir
miTTi ne umr kaaT hi li apni shaan se
ab surajon se haath milane ka vaqt hai
ukta ga.e hain log bahut sa.eban se
muddat se ro rahi hai samundar ki mauj mauj
kya kah gaya tha koi larazti zaban se
ham ne tamam-umr guzari hai us ke saath
vahshat si ho rahi hai hamen jis makan se
Leave a Reply