ye baten aaj ki kal jis kitab men likhna
tum apne jurm ko mere hisab men likhna
hadis-e-dil ko qalam se na ashna karna
kahaniyan hi hamesha javab men likhna
mujhe samajhne ki koshish hai shaghl-e-la-hasil
jo chahna vahi tum mere baab men likhna
vo kahte hain likho naama magar lihaz rahe
hamara naam na hargiz ḳhitab men likhna
miTa miTa jo raha zulmaton ke parde men
vo harf-e-haq varaq-e-aftab men likhna
hamesha jis ki havas ko thi arzu-e-bahisht
usi ki ruuh rahi thi azaab men likhna
jo baat likhne ko tha muztarib bahut ‘naushad’
vahi main bhuul gaya iztirab men likhna
Leave a Reply