Had-E-Unwan Se Aage aaKHir Afsane Kahan Jate

had-e-unvan se aage aḳhir afsane kahan jaate

tiri mahfil se baḌh kar tere divane kahan jaate

haqiqat se guzar kar a.ina-ḳhane kahan jaate

agar ham tak nahin aate to paimane kahan jaate

gham-e-dauran ne baḌh kar lau baḌha di sham-e-hasti ki

gham-e-janan ke ye bhaTke hue jaane kahan jaate

nigahen thiin hamari farq-e-ḳhas-o-am se aage

agar vo aa bhi jaate ham se pahchane kahan jaate

ye rindon ki hai shan-e-be-niyazi saqiyo varna

na jaane tum kahan hote ye maiḳhane kahan jaate

bharam ashk-e-alam ka rakh liya zarron ke sinon ne

sitaron ki jabinen varna sulgane kahan jaate

bahar aa.e baghair un par ‘shifa’ hai be-ḳhudi taari

bahar aati to kya malum mastane kahan jaate