talḳh guzre ki shadman guzre
zindagi ho to kyuun garan guzre
tha jahan muddaton se sannaTa
ham vahan se bhi naghma-ḳhvan guzre
marhale saḳht the magar ham log
surat-e-mauj-e-ravan guzre
mere hi dil ki dhaḌkanen hongi
tum mire paas se kahan guzre
kyuun na Dhal jaa.e mere naghmon men
kyuun tira husn ra.egan guzre
chand lamhe ḳhayal-o-ḳhvab sahi
chand lamhe anis-e-jan guzre
kitne ḳhamosh hadse ‘javed’
dil hi dil men nihan nihan guzre
Leave a Reply