Alamtaab Tishna
miri dastaras men hai gar qalam mujhe husn-e-fikr-o-ḳhayal de
mujhe shahryar-e-suḳhan bana aur enan-e-shahr-e-kamal de
miri shaḳh-e-sher rahe hari de mire suḳhan ko sanobari
miri jhiil men bhi kanval khila miri gudḌiyon ko bhi la.al de
tiri baḳhshishon men hai sarvari mire ishq ko de qalandari
jo uThe to dast-e-dua lage mujhe aisa dast-e-saval de
rag-e-jan men jamne laga lahu use mushk banne ki aarzu
hai udaas dasht-e-tatar-e-dil use phir shalang-e-ghazal de
koi baat aqrab-o-shams ki koi zikr-e-zohra-o-mushtari
tu baḌa sitara-shanas hai mujhe koi achchhi si faal de
hain ye jism-o-jan ki quyud kya ḳhad-o-ḳhal ke ye hudud kya
main huun aks-e-manzar-e-mavara mujhe a.inon se nikal de
main vahi huun ’tishna’-e-ba-vafa mira aaj bhi vahi mudda.a
na firaq de mujhe mustaqil na mujhe hamesha visal de
Leave a Reply