us ne koi to dam paḌha hua hai
jis ne dekha vo mubtala hua hai
ab tire raste se bach niklun
ik yahi rasta bacha hua hai
aao taqrib-e-ru-numa.i karen
paanv men ek aabla hua hai
phir vahi bahs chheḌ dete ho
itni mushkil se rabta hua hai
raat ki vardat mat puchho
vaqa.i ek vaqi.a hua hai
lag raha hai ye narm lahje se
phir tujhe koi mas.ala hua hai
main kahan aur vo fasil kahan
fasle ka hi faisla hua hai
itna masruf ho gaya huun ki bas
‘mir’ bhi ik taraf paḌa hua hai
aaj kuchh bhi nahin hua ‘javvad’
haan magar ek saneha hua hai
Leave a Reply