Habib Jalib
kabhi to mehrban ho kar bula len
ye mahvash ham faqiron ki dua len
na jaane phir ye rut aa.e na aa.e
javan phulon ki kuchh ḳhushbu chura len
bahut ro.e zamane ke liye ham
zara apne liye aansu baha len
ham un ko bhulne vaale nahin hain
samajhte hain gham-e-dauran ki chalen
hamari bhi sambhal ja.egi halat
vo pahle apni zulfen to sambhalen
nikalne ko hai vo mahtab ghar se
sitaron se kaho nazren jhuka len
ham apne raste par chal rahe hain
janab-e-shaiḳh apna rasta len
zamana to yunhi ruTha rahega
chalo ‘jalib’ unhen chal kar mana len
Leave a Reply