Zakia Ghazal
sada-e-mehr-o-mohabbat lagane aa.e hain
jo baar uTh nahin sakta uThane aa.e hain
ye kaisa aib hai mere nagar ke logon men
diye jala na sake to bujhane aa.e hain
jo be-hunar hain zara un ka hausla dekho
vo dusron ke hunar azmane aa.e hain
ajiib log hain pindar bechne ke liye
ḳhud apne aap ki qimat lagane aa.e hain
munafiqat ke usulon pe ham nahin zinda
jo aap sun nahin sakte sunane aa.e hain
chali hai bad-e-muḳhalif to gham nahin hai ki ham
charagh apne lahu se jalane aa.e hain
Leave a Reply