Nasir Zaidi
dayar-e-shauq men koson kahin hava bhi nahin
umas hai aisa ki patta koi hila bhi nahin
ḳhafa nahin hai magar is ada ko kya kahiye
pukarta huun to vo muḌ ke dekhta bhi nahin
ye kis maqam pe tanha.i saunpte ho mujhe
ki ab to tark-e-tamanna ka hausla bhi nahin
baḌa gila hai dil-e-gham-parast ko tum se
vo dard us ko diya hai jo la-dava bhi nahin
kahan talash karen juz tire sukun-e-nazar
ki is jahan men koi tujh sa dusra bhi nahin
basa hua hai mire dil men bu-e-gul ki tarah
vo duur duur hai mujh se magar juda bhi nahin
kise sunaoge tum muzhda-e-sahar ‘nasir’
vo rat-jage hue ab koi jagta bhi nahin
Leave a Reply