Aleem Usmani
bada-ḳhane ki rivayat ko nibhana chahiye
jaam agar ḳhali bhi ho gardish men aana chahiye
aaj aana hai unhen lekin na aana chahiye
va.ada-e-farda usulan bhuul jaana chahiye
tark karna chahiye hargiz na rasm-e-intizar
muntazir ko umr bhar sham.en jalana chahiye
jazb kar lete hain achchhi suraton ko aa.ine
a.inon se kiya tumhen ankhen milana chahiye
mere us ke biich jo halat ki divar hai
mujh ko us divar men ik dar banana chahiye
phir karam-agin tabassum men hai poshida sitam
hosh-mandon ko paheli buujh jaana chahiye
gardish-e-halat se mayus hona kufr hai
umr bhar insan ko qismat azmana chahiye
meri ghazlen hongi kal na-mahramon ke darmiyan
us ki ḳhushbu meri ghazlon men na aana chahiye
ham to qaa.il hi nahin mahdud-e-ulfat ke ‘alim’
ham ko ulfat ke liye saara zamana chahiye
Leave a Reply