sab thakan aankh men simaT jaa.e
niind aa jaa.e raat kaT jaa.e
ru-ba-ru hon to guftugu bhi karen
kaun avaz se lipaT jaa.e
vahm ye hai ki band darvaza
dekh kar hi na vo palaT jaa.e
siikh dariya se koh-paima.i
koi kyuun raste se haT jaa.e
kaun marega dusra patthar
koi surat ki dard baT jaa.e
main hava huun ki chal raha huun hanuz
arsa-e-dahr hi na kaT jaa.e
be-dili ḳhil.at-e-nadamat hai
ik bala hai agar chimaT jaa.e
apne chehre ko Dhanp Dhanp ke rakh
aa.ina gard se na aT jaa.e
Leave a Reply