yuun dil o jaan ki tauqir men masruf tha main
jaise ajdad ki jagir men masruf tha main
tisha-e-vaqt ne buniyad hila di varna
har ghaḌi zaat ki tamir men masruf tha main
ḳhvab dekha tha mohabbat ka mohabbat ki qasam
phir isi ḳhvab ki tabir men masruf tha main
lafz rangon men naha.e hue ghar men aa.e
teri avaz ki tasvir men masruf tha main
ek ik pal miri palkon men simaT aaya hai
ahd-e-gum-gashta ki tahrir men masruf tha main
ab tire vaste abad karunga duniya
ek arsa tiri taqdir men masruf tha main
Leave a Reply