abhi tak jo nahin dekhe vo manzar dekh lete hain
chalo aapas men ham ankhen badal kar dekh lete hain
koi bhi ḳhvab ho ankhon se bach kar rah nahin sakta
jazire chhup bhi jaa.en to samundar dekh lete hain
faza ko chiir dete hain parinde apni chiḳhon se
zamin par jab kahin bikhre hue par dekh lete hain
unhen fankar ko pahchanna bhi ḳhuub aata hai
hunar hai kis ke hathon men ye patthar dekh lete hain
hamen ma.alum hai ham ḳhairiyat se afiyat se hain
magar ham ehtiyatan dosh par sar dekh lete hain
Leave a Reply