faiz-ahmad-faiz

Ai Habib-E-Ambar-Dast!

kisi ke dast-e-inayat ne kunj-e-zindan men

kiya hai aaj ajab dil-navaz band-o-bast

mahak rahi hai faza zulf-e-yar ki surat

hava hai garmi-e-khushbu se is tarah sarmast

abhi abhi koi guzra hai gul-badan goya

kahin qarib se, gesu-ba-dosh, ghuncha-ba-dast

liye hai bu-e-rifaqat agar hava-e-chaman

to laakh pahre bithaen qafas pe zulm-parast

hamesha sabz rahegi vo shakh-e-mehr-o-vafa

ki jis ke saath bandhi hai dilon ki fath o shikast

ye sher-e-hafiz-e-shiraz, ai saba! kahna

mile jo tujh se kahin vo habib-e-ambar-dast

”khalal-pazir buad har bina ki mai-bini

ba-juz bina-e-mohabbat ki khali az-khalal-ast”

More Poems

Leave a Comment