Nasir Zaidi
misal-e-sada-varaq tha magar kitab men tha
vo din bhi the main tire ishq ke nisab men tha
bhula chuka hai tu ik baar mujh se aa kar sun
vahi sabaq jo kabhi tere dil ke baab men tha
jo aaj mujh se bichhaḌ kar baḌe sukun men hai
kabhi vo shaḳhs mire vaste azaab men tha
usi ne mujh ko gham-o-soz-e-javidan baḳhsha
vo ek chand ka TukḌa sa jo naqab men tha
mira vajud mujassam ḳhulus tha ‘nasir’
main phir bhi bargah-e-husn ke itaab men tha
Leave a Reply