Saifuddin Saif
kya manzil-e-gham simaT ga.i hai
ik aah men raah kaT ga.i hai
phir samne hai pahaḌ si raat
phir shaam se niind uchaT ga.i hai
pahlu men ye kaisa dard uTha hai
ye kaun si raah kaT ga.i hai
aap aa.e nahin to maut kambaḳht
aa aa ke palaT palaT ga.i hai
uTh uTh ke mariz-e-gham ne puchha
kya hijr ki raat kaT ga.i hai
phir ‘saif’ hava-e-yad-e-rafta
har gham ki naqab ulaT ga.i hai
Leave a Reply