Basir Sultan Kazmi
dil men har-chand aarzu thi bahut
kaam thoḌa tha guftugu thi bahut
sang-e-manzil ye chheḌta hai mujhe
aa tujhe meri justuju thi bahut
ai havas! dekh daagh daagh jigar
tu bhi mushtaq-e-rang-o-bu thi bahut
kaun hai jis se main nahin uljha
go miri tab.a sulh-ju thi bahut
baḌh ga.i tujh se mil ke tanha.i
ruuh juya-e-ham-subu thi bahut
ik tiri hi nigah men na jache
shahar men varna aabru thi bahut
Leave a Reply