Asad Badayuni
yahi nahin ki mira ghar badalta jaata hai
mizaj-e-sheher bhi badalta jaata hai
ruten qadim tavatur se aati jaati hain
daraḳht patton ke zevar badalta jaata hai
ufuq pe kyuun nahin rukti koi kiran pal bhar
ye kaun tezi se manzar badalta jaata hai
ghubar-e-vaqt men sab rang ghulte jaate hain
zamana kitne hi tevar badalta jaata hai
chhiḌi hui hai azal se dil o nigah men jang
mahaz ek hai lashkar badalta jaata hai
ye kis ka haath hai jo be-charagh raton men
fasil-e-shahr ke patthar badalta jaata hai
parind peḌ se parvaz karte jaate hain
ki bastiyon ka muqaddar badalta jaata hai
Leave a Reply