Shamim Ravish
duur tak phaili hui hai tirgi baten karo
Das na le ham ko kahin ye ḳhamushi baten karo
aao palkon se chunen bikhre hue lamhat ko
niind aa jaa.e na jab tak ḳhvab ki baten karo
bas yahi lamhe ghanimat hain ki ham tum saath hain
kaun jaane mil bhi paa.en phir kabhi baten karo
sirf ik karb-e-musalsal hi nahin hai zindagi
muḳhtasar vaqfe ki surat hai ḳhushi baten karo
ruuh ke nasur to riste rahenge umr bhar
dard men aa jaa.e shayad kuchh kami baten karo
kaun jaane kal ka suraj dekh bhi pa.enge ham
jab talak hai raat baaqi bas yunhi baten karo
is qadar ḳhamosh rahna bhi nahin achchha ‘ravish’
chha na jaa.e zehn par afsurdagi baten karo
Leave a Reply