waseem-barelvi

Mere Gham Ko Jo Apna Batate Rahe

mere gham ko jo apna batate rahe

vaqt padne pe hathon se jaate rahe

barishen aaiin aur faisla kar gaiin

log tuuti chhaten azmate rahe

ankhen manzar huiin kaan naghma hue

ghar ke andaz hi ghar se jaate rahe

shaam aai to bichhde hue ham-safar

ansuon se in ankhon men aate rahe

nanhe bachchon ne chhu bhi liya chand ko

budhe baaba kahani sunate rahe

duur tak haath men koi patthar na tha

phir bhi ham jaane kyuun sar bachate rahe

shairi zahr thi kya karen ai ‘vasim’

log piite rahe ham pilate rahe

More Poems

Leave a Comment