Shakeel Badayuni
ik shahanshah ne banva ke hasin taj-mahal
saari duniya ko mohabbat ki nishani di hai
is ke saae men sada pyaar ke charche honge
khatm jo ho na sakegi vo kahani di hai
ik shahanshah ne banva ke hasin taj-mahal
taaj vo shama hai ulfat ke sanam-khane ki
jis ke parvanon men muflis bhi hain zardar bhi hain
sang-e-marmar men samae hue khvabon ki qasam
marhale pyaar ke asan bhi hain dushvar bhi hain
dil ko ik josh iradon ko javani di hai
ik shahanshah ne banva ke hasin taj-mahal
taaj ik zinda tasavvur hai kisi shaer ka
us ka afsana haqiqat ke siva kuchh bhi nahin
is ke aghosh men aa kar ye guman hota hai
zindagi jaise mohabbat ke siva kuchh bhi nahin
taaj ne pyaar ki maujon ko ravani di hai
ik shahanshah ne banva ke hasin taj-mahal
ye hasin raat ye mahki hui pur-nur faza
ho ijazat to ye dil ishq ka izhar kare
ishq insan ko insan bana deta hai
kis ki himmat hai mohabbat se jo inkar kare
aaj taqdir ne ye raat suhani di hai
ik shahanshah ne banva ke hasin taaj mahal
saari duniya ko mohabbat ki nishani di hai
ik shahanshah ne banva ke hasin taj-mahal…..
Leave a Reply