Dil-Azari Mohabbat Mein Kahan Malum Hoti Hai

Talib Baghpati

dil-azari mohabbat men kahan ma.alum hoti hai

ajab taskin pas-e-soz-e-nihan ma.alum hoti hai

nigah-e-naz aksar dastan ma.alum hoti hai

kisi ki aankh ham-vasf-e-zaban ma.alum hoti hai

ḳhudaya ḳhair kya taaza tabahi aane vaali hai

ḳhamoshi se qarib-e-ashiyan ma.alum hoti hai

chhupi jaati hai manzil hi ghubar-e-rah-e-manzil men

miri qismat sharik-e-karvan ma.alum hoti hai

ye garm-e-guftugu sayyad kis se hai zara sun lo

qafas vaalo sada-e-baghban ma.alum hoti hai

miri baten to vo shikva samajh kar sun nahin sakte

ḳhamoshi bhi unhen meri garan ma.alum hoti hai

fareb-e-shauq men manzil jinhen ankhen samajhti thiin

vahi ab ah-e-gard-e-karvan ma.alum hoti hai

ghurur-e-husn se koshish matanat iḳhtiyari ki

tumhari shoḳhiyon men ra.egan ma.alum hoti hai

zamane ki zaban par hai unhin ki dastan ‘talib’

unhen har baat meri dastan ma.alum hoti hai