Meer Hasan
jan-o-dil hain udaas se mere
uth gaya kaun paas se mere
koi bhi ab umiid baaqi hai
puchhiyo dagh-e-yas se mere
sab ki arzi se khush ho tum lekin
ho khafa iltimas se mere
shayad uthne ka qasd tum ne kiya
ud chale kuchh havas se mere
aish mujh tak to pahunche tab jo tale
fauj-e-gham as-pas se mere
duur hi duur phirte hain kuchh bakht
ab to ummid-o-yas se mere
kya main thahraun us ko dil men ‘hasan’
hai vo bahar qayas se mere
Leave a Reply