Riaz Majeed
vaqt ḳhush-ḳhush kaTne ka mashvara dete hue
ro paḌa vo aap mujh ko hausla dete hue
us se kab dekhi ga.i thi mere ruḳh ki murdani
pher leta tha vo munh mujh ko dava dete hue
ḳhvab-e-be-ta.abir si sochen mire kis kaam ki
sochta itna to vo dast-e-ata dete hue
be-zabani baḳhsh di ḳhud-ehtisabi ne mujhe
honT sil jaate hain duniya ko gila dete hue
apni rah masdud kar dega yahi baḌhta hujum
ye na socha har kisi ko rasta dete hue
ap-apne qatl men shamil tha main maqtul-e-shauq
ye khula mujh par talab ka ḳhun-baha dete hue
vo hamen jab tak nazar aata raha takte rahe
giili ankhon ukhḌe lafzon se dua dete hue
jaane kis dahshat ka saaya us ko mohr-e-lab hua
Dar raha hai vo mujhe khul kar sada dete hue
be-aman tha aap lekin mo.ajaza hai ye ‘riyaz’
hala-e-shafqat tha us ko aasra dete hue
Leave a Reply