zaḳhm siine ka phir ubhar aaya
yaad bhar koi chara-gar aaya
mujh ko baḳhshi ḳhuda ne ik beTi
chand angan men ik utar aaya
ḳhush nasibon ko ghar mila yaaro
mere hisse men phir safar aaya
tum taghayyur ki baat par Thahre
main salibon se baat kar aaya
apni tahzib ko nahin chhoḌa
ye bhi ilzam mere sar aaya
ik kali khil ke phuul men badli
ek bhanvra bhi phuul par aaya
paar utra ufuq ke suraj to
phir musafir ko yaad ghar aaya
dosti dhuup se hi kar li jab
raah men tab ghana shajar aaya
dil to ‘shayan’ TuTna hi tha
us ka kirdar bhi nazar aaya
Leave a Reply