Poet
sau daagh tamannaon ke ham khaa.e hue hain
gul jitne hain is baagh men murjha.e hue hain
sharminda huun main apni duaon ke asar se
vo aaj pareshan hain ghabra.e hue hain
ḳhuddari-e-gesu ka hai us ruḳh pe ye aalam
jhukna jo paḌa un ko to bal khaa.e hue hain
ab tum bhi zara husn-e-jahan-soz ko roko
ham to dil-e-be-tab ko samjha.e hue hain
ai dast-e-karam phenk de kaunain ko is men
daman ko tire samne phaila.e hue hain
phoḌenge jabin ab tire dar par tire muhtaj
barbad hain taqdir ke Thukra.e hue hain
aata hai baḌha bahr-e-karam josh men ‘kaifi’
ham apne gunahon pe jo sharma.e hue hain
Leave a Reply