go huun vahshi pa tire dar se na tal jaunga
haan magar dasht-e-adam hi ko nikal jaunga
tair-e-nama-bar apna yahi kahta hai ki aah
raqam-e-shauq ki garmi se main jal jaunga
jald ai kaash jatave use joban us ka
phir ho kis kaam ke tum jab ki main dhal jaunga
aaj go us ne ba-rusvai nikala mujh ko
gar yahi dil hai to phir aap se kal jaunga
mashvara kar ke ye dil kucha-e-janan ko chala
azm to laane ka kiijo main machal jaunga
gar yahi atish-e-ulfat hai to manind-e-sipand
aah men mujmir hasti se uchhal jaunga
nau-giraftar-e-mohabbat huun miri vaza se tum
itna ghabrao na pyare main sambhal jaunga
vaae qismat kahe jab sabr sa munis ye baat
tujh pe dekhunga bura vaqt to tal jaunga
jald khu apni badal varna koi kar ke tilism
aa ke dil apna tire dil se badal jaunga
ji kahin tu na phansa varna tire daam se main
ab-e-ghirbal ki manind nikal jaunga
juun hina apne vo qadmon se na lagne denge
is tamanna men agar khaak men ral jaunga
jaate jaate kaf-e-afsos isi hasrat men
ashk bhar la ke dam-e-naza bhi mal jaunga
jin ke nazdik hai andaz-e-ghazal ‘mir’ pe khatm
un ko ‘jurat’ main sunane ye ghazal jaunga
Leave a Reply