ban ga.i hai maut kitni ḳhush-ada mere liye
sar jhuka kar phuul karte hain dua mere liye
tum na murjhao to kaliyo kal bata dena use
kuchh samajh kar khoi khoi hai saba mere liye
main to bas un ke hi rang-o-nur ka akkas tha
muztarib hai kyuun sitaron ki ziya mere liye
meri hi ḳhatir tha ahd-e-tark-e-ara.ish magar
phir vo aa.e hain kanar-e-a.ina mere liye
jagmaga uThti hai dil men ik muqaddas raushni
jab nahin hota kahin bhi aasra mere liye
sochta huun phir uTha luun barbat-e-kohna ‘salam’
muntazir hai sher-o-naghma ka ḳhuda mere liye
Leave a Reply