Jitendra Mohan Sinha Rahbar
avara sa galiyon men jo main ghuum raha huun
zahir hai tiri diid se mahrum raha huun
phir ankhen bichha.e hue huun raah men us ki
phir har kisi rah-rav ke qadam chuum raha huun
ye hai miri bedari-e-qalbi ki hi ik vaz.a
har-chand tiri bazm men main jhuum raha huun
ghaddari-e-ulfat to nahin hai mira sheva
is jurm ke hi ḳhyal se ma.asum raha huun
ḳhush-qismati-e-ahl-e-junun hai mira hissa
asa.ish-e-duniyavi se mahrum raha huun
main bargah-e-husn se mayus na aata
gham hai vale taqdir men maghmum raha huun
huun kya ki jo vo qadr bhi karte miri ‘rahbar’
ik harf huun aur harf bhi mauhum raha huun
Leave a Reply