Rifat Sarosh
na koi dost na dushman ajiib duniya hai
ye zindagi hai ki tanha.iyon ka sahra hai
badalte rahte hain har moḌ par safar ke rafiq
gham-e-hayat magar saath saath chalta hai
ye shahr-e-dard hai logon sambhal sambhal ke chalo
har ek zarre men abad dil ki duniya hai
banega ye naya asman-e-fikr-o-nazar
ghubar-e-rah jo pamal ho ke uTTha hai
jo dekhiye to bagula hai reg-e-avara
jo sochiye to yahi abru-e-sahra hai
kuchh aaj rang hai maila faza ke anchal ka
zarur adam-e-ḳhaki idhar se guzra hai
‘sarosh’ vadi-e-ghurbat se be-ḳhabar guzro
tumhare saath mohabbat ka narm saaya hai
Leave a Reply