dil bahut masruf tha kal aaj be-karon men hai
saat pardon men jo rahta tha vo bazaron men hai
ḳhaak ke putle falak ki sarhadon ko chhu chuke
aur jise insan kahte hain abhi gharon men hai
laaj rakh lete hain meri munh pe kuchh kahte nahin
dushmani ka kuchh saliqa to mire pyaron men hai
sab ko dekha aur kisi ko dekh kar TuuTa nahin
aa.ina shayad abhi apne parastaron men hai
dhuup kaisi thi ki mere haath kaale kar ga.i
tirgi ka rang shayad nuur ke dharon men hai
sab sada.en lafz hain lafzon ke pichhe kuchh nahin
dekhna ye hai ki koi sar bhi dastaron men hai
bar-sar-e-paikar donon hain natija kuchh nahin
josh hai dariyaon men aur sabr divaron men hai
ḳhair o shar ki mish.alon ko tu bujhata kyuun nahin
main to kya huun ik farishta bhi gunahgaron men hai
dekhte kya ho ki ḳhud manzar tumhen takne laga
bechte kya ho ki yusuf bhi ḳharidaron men hai
koi bhi manzil nahin apni kashish donon taraf
paanv miTTi men gaḌe hain aankh sayyaron men hai
ab haqiqat jaan kar ‘shahzad’ kya lena mujhe
vaj.h-e-ghaza hi sahi sho.ala to ruḳhsaron men hai
Leave a Reply