Saleem Shahid
sub.h-e-safar ka raaz kisi par yahan na khol
tufan hai paniyon men abhi badban na khol
pasmandgan pe chhoḌ ki DhunDen nuqush-e-pa
jo sang-o-ḳhisht hain tah-e-ab-e-ravan na khol
main ne sarab-e-fahm ke sab raaz pa liye
ab laakh mujh pe uqda-e-haft-asman na khol
sab kuchh yahan hai chashm-e-ḳharidar ki pasand
uzr-e-mata-e-dard agar hai dukan na khol
shaḳh-e-shajar pe sho.ala-e-ḳhurshid bujh to le
kuchh der tirgi pe dar-e-ḳhak-dan na khol
har bazm kyuun numa.ish-e-zaḳhm-e-hunar bane
har bhed apne doston ke darmiyan na khol
‘shahid’ hisar-e-jail pe teshe se vaar kar
in pattharon ke ru-ba-ru apni zaban na khol
Leave a Reply