Ye Teri KHalq-Nawazi Ka Taqaza Bhi Nahin

Shakeel Jamali

ye tiri ḳhalq-navazi ka taqaza bhi nahin

kahin dariya hai ravan aur kahin qatra bhi nahin

apne aqaon ke aibon ko mahasin samjhe

itni paband-e-aqidat to re.aya bhi nahin

iḳhtiyarat se haq tak hain zabani baten

dastaḳhat kya kisi kaghaz pe anguTha bhi nahin

koi imkan nahin hai kisi ḳhush-fahmi ka

chara-gar tum ho to phir zaḳhm ko bharna bhi nahin

ishtiharat lage hain miri ḳhush-hali ke

aur thali men miri ḳhushk nivala bhi nahin

ye ujala koi sazish hai ye jugnu hai fareb

sub.h se pahle charaghon ko bujhana bhi nahin