zehra-nigaah

Sham Ka Pahla Tara

jab jhonka tez havaon ka

kuchh soch ke dhime guzra tha

jab tapte suraj ka chehra

uudi chadar men lipta tha

jab sukhi mitti ka siina

sanson ki nami se jaaga tha

ham log us shaam ikatthe the

jis ne hamen hans kar dekha tha

vo pahla dost hamara tha

vo shaam ka pahla taara tha

jo shayad ham donon ke liye

kuchh vaqt se pahle nikla tha

jab jhilmil karta vo kamra

cigaret ke dhuen se dhundla tha

jab nashsha-e-mai ki talkhi se!

har shakhs ka lahja mitha tha

har fikr ki apni manzil thi

har soch ka apna rasta tha

ham log us raat ikatthe the

us raat bhi kya hangama tha

main mahv-e-mudarat-e-alam

aur tum ko zauq-e-tamasha tha

mauzu-e-sukhan jis par ham ne

raae di thi aur socha tha

duniya ki badalti halat thi

kuchh ab-o-hava ka qissa tha

jab sab logon ki ankhon men

kamre ka dhuan bhar aaya tha

tab main ne khidki kholi thii!

tum ne parda sarkaya tha

jis ne hamen dukh se dekha tha

vo pahla dost hamara tha

vo shaam ka pahla taara tha

jo shayad ham donon ke liye

us raat sahar tak jaaga tha

vo shaam ka pahla taara tha

More Poems

Leave a Comment