sar jhukata nahin kabhi shisha
ham se karta hai sar-kashi shisha
kurra-e-nar hai mira siina
shisha-e-dil hai atishi shisha
dil men rakkha tha us ko dil bhi gaya
ud gai le ke ik pari shisha
dukhtar-e-raz pe zor-e-alam hai
is pari se hua pari shisha
khuun rota hai qahqahe ke saath
khuub hansta hai ye hansi shisha
zakhm-e-dil ka jo phat gaya angur
hoega mai ka mustaji shisha
yaad aata hai mujh ko dil ai ‘mehr’
dekhta huun main jab kabhi shisha
Leave a Reply