Poet
na.i paud ke soch-mahal men uTThin na.i na.i divaren
jaise ghar vaale vaisa ghar jaisa ghar vaisi divaren
kis se gila karen vo ya main aḳhir ranj niji hota hai
us tak us ki raah ki miTTi aur mujh tak meri divaren
ka.i baat to ghar men leTe leTe dam ghuTne lagta hai
aage pichhe baḌhti ghaTti rahti hain ghar ki divaren
har din ham banjaron aisa koi safar kar ke dekhe to
paanv tale dhansti si dharti kandhon par pakki divaren
mujh ko hattyara mat kahna mera lahu hai un hathon par
jin hathon par rok raha huun char-taraf girti divaren
laakh badalna chaho lekin maan ko maan kahte banti hai
miTTi vahi vahi hai dharti badal ga.iin pichhli divaren
‘ashk’ koi hai mujh men jo din chaḌhte chaḌhte Dah deta hai
raat ga.e tak chuni hui be-hangam miTTi ki divaren
Leave a Reply