Afzal Parvez
khush-qismat hain vo jo gaanv men lambi taan ke sote hain
ham to shahr ke shor men shab-bhar apni jaan ko rote hain
kis kis dard ko apnaen aur kis kis zakhm ko sahlaen
dekhti ankhon qadam qadam par kai havadis hote hain
dil ki dilli lut gai is ke aivanon men ghadar machi
khuddari ke mughal shahzade shahr men thaliya dhote hain
khush-lahnon ke liye gulshan bhi kunj-e-qafas ban jaae to
jabr ke gun gaate hain ya naghmon men dard samote hain
shaam ne din ka saath chhudaya raat ne dasht men aan liya
aise safar men rahgiron par saans bhi dubhar hote hain
main to apni jaan pe khel ke pyaar ki baazi jiit gaya
qatil haar gae jo ab tak khuun ke chhinte dhote hain
dil ke ziyan ka sabab kya puchho un tufanon ko dekho
jin ke bhanvar sahil ke safinon ko bhi aan dubote hain
‘parvez’ aaj nahin milti hai khum ke bhaav talchhat bhi
is par turra ye hai ki saaqi nashtar-e-taan chubhote hain
Leave a Reply