ruka javab ki khatir na kuchh saval kiya
magar ye zoam ki har rabta bahal kiya
thakan nahin hai kathin raston pe chalne ki
bichhadne valon ke dukh ne bahut niDhal kiya
jo tutna tha faqat dard hi ka rishta tha
to dil ne kyuun bhala is baat par malal kiya
bacha ke rakhna tha ik aks apni ankhon men
bade jatan se unhen aina-misal kiya
lahu men tair gai vo ghadi judai ki
ki jis ke zahr ne jiina mira muhal kiya
bichhad raha tha magar mud ke dekhta bhi raha
main muskurati rahi main ne bhi kamal kiya
khabar thi us ko ki dasht-e-hunar se aai huun
so us ke lafzon ne zakhmon ka indimal kiya