Navneet Sharma
raste se ga.e haTa.e ham
phir bhi manzil ke paas aa.e ham
the haqiqat nazar na aa.e ham
jab hue ḳhvab jagmaga.e ham
go chale the, pahunch na paa.e ham
ham vahin hain jahan se aa.e ham
apna badal talashne ke liye
umar bhar dhuup men naha.e ham
manzilen un ki har safar un ka
raste the bane-bana.e ham
shor din ka pila gaya chuppi
niind aa.i to baḌbaḌa.e ham
teri galiyon ko ghar kiya jab se
zindagi ke qarib aa.e ham
saath le kar makan kya chalte
ghar ko phir ghar hi chhoḌ aa.e ham
tujh pe ghussa the isli.e janan
be-sabab ḳhud pe tamtama.e ham
jab se ham ban ga.e tiri ankhen
dekh le roz DabDba.e ham
dard ki aanch gham ki bhaTTi thi
phir sarapa ga.e paka.e ham
Leave a Reply