Junun-E-Ishq Jise Sar-Phira Bana Dega

junūn-e-ishq jise sar-phirā banā degā

pahāḌ kaaT ke vo rāsta banā degā

ḳhumār-e-husn salāmat rakhe ḳhudā us kā

jahāñ vo chāhe vahāñ mai-kadā banā degā

usī ke qabza-e-qudrat meñ haiñ sabhī ke dil

vo jis ko chāhe use pārsā banā degā

ghirā huā mujhe dekhegā jab nadāmat meñ

vo merī aah ko harf-e-duā banā degā

mirā zamīr hī ab merā rahnumā Thahrā

ye har maqām pe mujh ko baḌā banā degā

jo dekh legā tumheñ koī manchalā mausam

tumhārī zulf se kaalī ghaTā banā degā

tū dūsroñ se hai bartar na ye samajh ‘rahbar’

ye e’tibār tujhe khokhlā banā degā

Leave a Comment