junun-e-ishq jise sar-phira bana dega
pahaḌ kaaT ke vo rasta bana dega
ḳhumar-e-husn salamat rakhe ḳhuda us ka
jahan vo chahe vahan mai-kada bana dega
usi ke qabza-e-qudrat men hain sabhi ke dil
vo jis ko chahe use parsa bana dega
ghira hua mujhe dekhega jab nadamat men
vo meri aah ko harf-e-dua bana dega
mira zamir hi ab mera rahnuma Thahra
ye har maqam pe mujh ko baḌa bana dega
jo dekh lega tumhen koi manchala mausam
tumhari zulf se kaali ghaTa bana dega
tu dusron se hai bartar na ye samajh ‘rahbar’
ye e’tibar tujhe khokhla bana dega
Leave a Reply