chand chhune ki talabgar nahin ho sakti
kya miri ḳhaak chamakdar nahin ho sakti
ho na ho apni basarat ne mujhe roka hai
ghaib jaate hue divar nahin ho sakti
jitni peḌon men nazar aati hai taqlib ke ba.ad
ye zamin itni pur-asrar nahin ho sakti
main ne DhunDa hai charaghon ki lavon men tujh ko
tu sitare men numudar nahin ho sakti
ye zaminon pe lahakti hui gandum ki mahak
asmanon ki taraf-dar nahin ho sakti
main kise ḳhvab sunane ke liye aaya huun
shab agar niind se bedar nahin ho sakti
jis ne aansu pe qana.at ka chalan sikha ho
vo nazar ḳhugar-e-dinar nahin ho sakti
Leave a Reply