Shakeel Jamali
kisi ka saath miyan ji sada nahin raha hai
magar dilon ko abhi sabr aa nahin raha hai
yahi to hai jo ḳhayalon se ja nahin raha hai
ye aadmi jo mira phone uTha nahin raha hai
hamare biich koi ba-vafa nahin raha hai
ye baat koi kisi ko bata nahin raha hai
mire aziiz miri ghibaton men lag ga.e hain
ki ab kisi ko koi mashghala nahin raha hai
kahin use mira nemul-badal na mil gaya ho
ka.i dinon se miri samt aa nahin raha hai
ye chand faisla-kun sa.aten hain sab ke liye
isi liye to koi muskura nahin raha hai
sab apne apne kaTore liye khaḌe hue hain
kisi ke haath abhi kuchh bhi aa nahin raha hai
tire gunah se parda zarur uTThega
abhi to ḳhair koi bhi uTha nahin raha hai
jo rang mujh se mire naqidin chahte hain
vo rang meri kahani men aa nahin raha hai
Leave a Reply