Farigh Bukhari
kya adu kya dost sab ko bha ga.iin rusva.iyan
kaun aa kar napta ehsas ki pahna.iyan
ab kisi mausam ki be-rahmi ka koi gham nahin
ham ne ankhon men saja.i hain tiri angḌa.iyan
aap kya aa.e baharon ke dariche khul ga.e
ḳhushbuon men bas ga.iin tarsi hui tanha.iyan
chand ban kar kaun utra hai qaba-e-jism men
jaag uTThi hain ḳhayal-o-fikr ki gahra.iyan
dil pe hai chhaya hua bedar ḳhvabon ka tilism
zehn ke angan men lahrati hain kuchh parchha.iyan
aaj ‘farigh’ ujḌe ujḌe se hain ‘ghalib’ ki tarah
yaad thiin ham ko bhi ranga-rang bazm-ara.iyan
Leave a Reply